Jahmir Hyka: Ndaj Holandës do zë vendin e Skelës

Blerja më e re e Tiranës, talenti 19-vjeçar që konsiderohet e ardhmja e mesfushës së kombëtares shqiptare, Jahmir Hyka, në një intervistë ekskluzive për gazetën “SOT”, rrëfen arsyet që e Blerja më e re e Tiranës, talenti 19-vjeçar që konsiderohet e ardhmja e mesfushës së kombëtares shqiptare, Jahmir Hyka, në një intervistë ekskluzive për gazetën “SOT”, rrëfen arsyet që e sollën në Tiranë si edhe synimet që ai ka për këtë sezon. Fantazisti është huazuar për një sezon nga bardheblutë dhe synon që të luajë sa më shumë, duke mos e fshehur dëshirën që të zërë edhe vend në formacionin bazë. Hyka tregon për muajt që qëndroi në Greqi dhe mbresat që kaloi me lojtarë të klasit botëror si Rivaldo apo Xhorxheviç.Futbollisti 19-vjeçar që është krahasuar edhe me Leo Messin, flet edhe për kombëtaren shqiptare, marrëdhëniet me Bariç dhe shpalos hapur synimin e tij që të jetë në vend të Skelës në ndeshjen e rëndësishme të 12 shtatorit kundër Holandës. Gjithashtu, Hyka jep mendimin e tij edhe për ecurinë e kuqezinjve në këtë edicion eliminatoresh si edhe i pëlqen rinovimi i përfaqësueses që është duke u bërë nga trajneri Oto Bariç.

-Sapo keni nënshkruar për një sezon me skuadrën kampione të Shqipërisë, me Tiranën. Si ndiheni?
-Ndihem shumë mirë dhe jam shumë i gëzuar që arrita këtë marrëveshje që më duket se është zgjedhja e duhur. Synimi im kryesor është që të luaj sa më shumë dhe pikërisht kjo ishte edhe arsyeja që vendosa të nënshkruaj për një sezon me ekipin bardheblu. Besoj se Tirana do të ma japë këtë mundësi që gjatë këtij sezoni të luaj sa më shumë dhe të synoj gjithashtu një vend titullari.

-Keni 4 ditë që stërviteni me kampionët e Superligës. Si ju kanë pritur lojtarët dhe trajneri te skuadra e Tiranës?
-Më kanë pritur shumë mirë dhe ashtu siç e thashë unë ndihem OK te klubi bardheblu. Mund të them se shumicën e lojtarëve që janë pjesë e skuadrës së Tiranës i njoh. Gjithashtu, gjatë seancave stërvitore jam ndjerë mirë dhe kam parë që ka një harmoni midis grupit, e cila është e njëjtë edhe ndaj meje. Edhe përsa i përket raportit me trajnerin Sulejman Starova mund të them se gjithçka ka shkuar mirë.

-A mendoni se mund të krijohet xhelozi te lojtarët e formacionit të bardhebluve për ardhjen tuaj, e cila mund të shkaktojë ndonjë qejfmbetje, nisur edhe nga fakti që mesfusha e Tiranës është “full”?
-Nuk besoj se do të krijohen xhelozira. Unë i njoh shumicën e lojtarëve dhe me disa prej tyre jam edhe në kombëtare. Ja kam kaluar dhe kaloj shumë mirë, dhe nuk besoj se ata do të ndiejnë xhelozi ndaj meje.

-Jeni tashmë në brendësi të skuadrës bardheblu. Një ditë përpara sfidës së kthimit kundër Domzhales në Ligën e Kampioneve, a mendoni se ka mundësi që kampionët ta kalojnë turin?
-Gjatë këtyre ditëve që jam duke u stërvitur te Tirana, shikoj që ka një optimizëm të madh te i gjithë grupi për ta fituar ndeshjen e së mërkurës dhe të arrihet kualifikimi. Shpresoj se skuadra do ta arrijë synimin që të kalojë në turin e dytë dhe të ma japin edhe mua mundësinë që të lauj në këtë tur.

-Një kalim te Tirana mund të “irritojë” tifozët e Dinamos, skuadrës tek e cila jeni rritur si futbollist. Prisni ndonjë reagim?
-Reagime mund të ketë dhe këtë nuk e vë në dyshim. Është e vërtetë që unë jam rritur te Dinamo dhe ndjej diçka për atë klub, por tashmë duhet të mendoj për veten time dhe për karrierën futbollistike. Te blutë kam qenë, por nuk ma dhanë mundësinë, shpresoj që të këtë ta arrij te bardheblutë.

-Cilat janë synimet tuaja te kampionët e Shqipërisë për sezonin e ardhshëm?
-Shpresoj që të luaj sa më shumë dhe të shënoj gola. Gjithashtu, të fitojmë edhe titullin kampion.

-Kush ja u ka mundësuar kalimin te Tirana?
-Përfaqësuesi im te Olimpiku i Tiranës që ka binjakëzim me Olimpiakosin në Greqi hyri në bisedime me kampionët dhe ramë dakord që të luaja për një sezon me bardheblutë.

-Keni kaluar një gjysëm sezoni në Greqi me skuadrën e Olimpiakosit, por që nuk arritët të luanit. Si u ndietë në këtë periudhë kohore teksa zhvillonit vetëm stërvitje intensive?
-Mund të them se jam ndjerë shumë mirë dhe kam mësuar shumë gjëra. Jam stërvitur me lojtarë të klasit botëror si Rivaldo, Xhorxheviç, apo shumë të tjerë duke mësuar nga klasi i tyre. Jam kam kaluar shumë mirë gjatë kësaj periudhe dhe shpresoj që të shkoj përsëri atje vitin tjetër.

-Dhe të synosh formacionin te Olimpiakosi...
-Shpresoj shumë që të ndodhë një gjë e tillë dhe këtë ja le në dorë zotit. Besoj se do të më ndihmojë që të luajë në këtë ekip të madh në Greqi, i cili ka edhe një emër të mirë në Europë.

-Duke qenë se qëndronit në një vend që njihet tashmë për racizmin e theksuar ndaj shqiptarëve, a jeni hasur ndonjëherë me këtë fenomen gjatë periudhës së qëndrimit në Greqi? Dhe nëse po, mendoni se largimi tuaj për te Tirana është ndikuar në një farë mase nga kjo çështje?-Nuk jam hasur asnjëherë me këtë fenomen gjatë periudhës që qëndrova në shtetin fqinj. Mund të them se me mua janë sjellë shumë mirë.

-Gjatë periudhës së qëndrimit tuaj në shtetin fqinj, a keni pasur kontakte me legjionarët e shumtë që aktivizohen në Greqi?
-Nuk kam pasur shumë kontakte, për vetë faktin që unë qëndroja në Athinë, ndërsa ata luanin jashtë kryeqytetit grek. Gjithsesëi, e kam gjetur mundësinë dhe kam kontaktuar me disa prej tyre.

-Kalojmë paksa te kombëtarja shqiptare. Pëlqeheni shumë nga trajneri kuqezi Oto Bariç, si edhe jeni cilësuar nga specialistë futbolli si e ardhmja e mesfushës së përfaqësueses...
-Jam në dijeni të faktit se trajneri i kombëtares Oto Bariç më ka shumë qejf ose ka simpati për mua. Besoj se në ndeshjen më të afërt të kuqezinjve, që është miqësorja kundër Maltës më 22 gusht, trajneri kroat do të më thërrasë në kombëtare dhe do të më aktivizojë në lojë. Kjo do të më shërbente shumë edhe mua që ta tregoj veten se kush jam. Për të menduar më pas edhe ndeshjen e 12 shtatorit kundër Holandës, teksa shpresoj se do të më marrë në skuadër dhe pse jo të aktivizohem në këtë takim të rëndësishëm.

-Sa janë shpresat tuaja për tu thirrur në këtë ndeshje?-Mund të them se kam shumë shpresë për ndeshjen kundër Holandës, dhe këtë e mbështes në faktin që në takimin kundër “tulipanëve” do të mungojë mesfushori Ervin Skela. Gjithashtu, besoj edhe në mbështetjen e zotit, tek i cili besoj shumë.

-Nuk duhet harruar edhe fakti që në këtë periudhë janë edhe ndeshjet e tjera eliminatore të kombëtares së Shpresave...
-Unë tani jam duke punuar dhe duke u stërvitur seriozisht për ndeshjen miqësore kundër Maltës. Se ç'farë do të ndodhë më pas dhe se si do të mendojë Bariç, a do të më thërrasë në takimin me Holandën, apo do të më lerë me Shpresat, kjo nuk ka rëndësi, kryesorja është që unë të luaj. Megjithatë, nuk e fsheh asnjëherë dëshirën që të jem në fushë kundër “tulipanëve”.

-Tashmë mund të konsideroheni pa pikë dyshimi pjesë e kuqezinjve, duke qenë se jeni aktivizuar në dy takime miqësore dhe tashmë shpresoni që të debutoni në ndeshje zyrtare. Si pjestar i këtij grupi, si e shihni ecurinë e përfaqësueses sonë në këtë edicion eliminatoresh duke kuajtur që ndodhemi në vendin e katërt të Grupit G?-Është një edicion i mirë për kombëtaren. Në dy ndeshjet e fundit kundër Luksemburgut skuadra ka zhvilluar lojëra shumë të mira duke arritur edhe dy fitore. Të gjithë lojtarët dhanë maksimumin e tyre në këto takime duke shpërblyer në të njëjtën kohë edhe besimin e trajnerit Oto Bariç. Gjithashtu, këto ndeshje ndikuan në renditjen në vendin e katërt në grupin G si edhe në renditjen e FIFA-s. Tashmë, nuk ngelet gjë tjetër veçse të vazhdojmë me këtë ritëm të lartë edhe në takimet e tjera që na presin duke nisur që nga sfida e 12 shtatorit kundër Holandës, e cila do të luhet në vendin tonë.

-Ju jeni pjesë e elementëve të rinj që trajneri Bariç ka futur në ekipin përfaqësues duke arritur të realizojë në një farë mase rinovimin e shumëpërfolur të kombëtares, dhe duhet thënë se është realizuar mirë, teksa rezultatet nuk kanë munguar. Si e shihni këtë rinovim dhe largimin e disa “veteranëve”?
-Mund të them se mua më pëlqen diçka te trajneri Oto Bariç dhe pëkërisht ky fakt, që është mundur të fusë në skuadër sa më shumë elementë të rinj duke i aktivizuar. Përsa i përket të larguarve, them që atë e di vetë Bariç. Ata kanë qenë futbollistë që kanë dhënë shumë për kombëtaren, por që trajneri ashtu ka menduar dhe ashtu ka vepruar, duhet të pajtohemi me veprimin e tij.